اي والله أهوجس ولاني مرتاح
والحزن في حوش الحنايا بفاروع
أمسيت من وصل المواليف مزّاح
وأصبحت من فرقا المواليف مفجوع
البارحه في .. غبة الوصل سبّاح
واليوم من عرش المواصيل مخلوع
يا صاحبي صرح الهوى والوفا طاح
والقلب كنه من عراويه مقشوع
كان أحسب إن لـ حبنا عشرة أرواح
ألين شفت الحبل .. بـ يديه مقطوع
العام ... خلي يسمع القلب لاصاح
واليوم مهما صاح ماهو بـ مسموع
يوم العهد به حده أسبوع لا راح
اسبوع ,,, ويعوّد علي شوق وأدموع
واليوم خمس سنين والهم .. ما زاح
هم الفراق اللي بلا عذر مشروع
استغفر الله تسعة شهور يا صاح
في غيبته قمت أحسب اليوم بـإسبوع
ضاع الحساب وشفت برق الجفا لاح
وأيّست لولا أن الرجا فيّ مزروع
وحالي نحل والحال ماهو بـ منساح
من كثر ما اضما للمواصيل ,, وآجوع
بِليت .. في من دونه .. سيوف ورماح
وغدا علي وصله مثل حبة الكوع
له مني إن سره على الناس ما باح
ولي منه أن الصد غصبٍِ بلا طوع
محمد بن فطيس المري - ايه والله آهوجس
